Lygi Vegagerðarinnar

Í gær birtust í fjölmiðlum tilkynningar þess efnis að fjallvegir á Vestfjörðum yrðu ekki opnaðir. Eyrarfjallið vegna nýs boðlegs vegar fyrir Reykjanesið en Hrafnseyrar- og Dynjandisheiðar vegna þess að það er "búið að skerpa á tímasetningum" snjómokstursreglna. Einnig var fjárskortur nefndur sem ástæða þessa sinnuleysis.

Í gær hafði ég áætlað að keyra frá Suðureyri til Tálknafjarðar og vonaðist til að komast stystu leið. Vegagerðin var beitt nokkrum þrýstingi og veit ég að yfir hana rigndi fyrirspurnum. Forráðamenn hvikuðu þó hvergi og stóðu fast við fyrri yfirlýsingar þó þær haldi tæplega vatni. Þó fengum við fregnir af því að "einhverjar vinnuvélar hafi stungið sér í gegn yfir Hrafnseyrarheiðina" til að koma efni inn á Mjólkárvirkjun. Þrátt fyrir það var ástandslýsingu Hrafnseyrarheiðarinnar ekki breytt á vefsvæði Vegagerðarinnar en þar er leiðin yfir heiðina enn merkt rauðum til til marks um ófærð. Einnig fréttum við af jeppum sem komið hefðu "þarna vesturúr"

Í morgun var ákveðið að skella sér af stað og láta reyna á heiðarnar. Tengdafaðir minn ákvað að renna með okkur enda á góðum jeppa. Við lögðum snemma af stað því varaáætlunin fól í sér að siglt yrði eftir okkur frá Bíldudal og á Þingeyri. Það kom á daginn að um Hrafnseyrarheiðina er flennifæri. Dynjandisheiðin er hinsvegar þungfær og alls ekki fær fólksbílum. Hægt og rólega tókst okkur þó að skríða yfir snjóspýjurnar fimm sem töfðu för okkar yfir heiðina. Sú hæsta hefur kannski verið um hálfur metri að þykkt og voru þær allt upp í 20-30 metra breiðar. Snjórinn var passlega þéttur í sér og jeppanum tókst vel að skríða yfir skaflana. Þess á milli var ýmist auður vegur eða hálka. Ég get ekki ímyndað með að það tæki nema í mesta lagi klukkutíma fyrir plóg að renna þarna í gegn.   

Er þessi stofnun ekki með menn í fullri vinnu?  Hvernig stendur á því að ekki er hægt að senda einn mann til að plægja í gegnum samtals 200 metra af snjó á 20km vegarkafla? Ef slík aðgerð er svo gríðarleg kostnaðaraukning að nauðsynlegt er að brjóta mannréttindi heils landsfjórðungs þá er greinilega nauðsynlegt að endurskoða vinnu- og framkvæmdareglur Vegagerðarinnar. Ég hreinlega neita að trúa því sem einhver hélt fram, að kostnaðurinn við að halda þessu opnu hlaupi yfir hálfa milljón króna, án þess að sjá fyrir því sannanir. En burtséð frá aumum fyrirslætti varðandi mokstursleysi heiðana þá er ekkert sem afsakar þá helberu lygi sem borin er á borð fyrir Vestfirðinga.

Upplýsingarnar sem fram koma á myndinni að ofan eru rangar. Þetta er ekki spurning um ranga túlkun á aðstæðum, misskilning eða skort á vitneskju um raunverulegt ástand. Þetta er hrein og klár lygi sem er lögð fram að ásettu ráði.

Athugasemdir

[Elfar Logi Hannesson, 30.12.2008 kl. 20:42]

Vel að orði komist sonur sæll, ég hef sagt það áður og segi það enn þetta eru meiri jólasveinarnir. En við verðum að halda áfram og kannski einn daginn verður Vestfirðir eitt júnit en ekki tvo einsog nú er.

[Sigurður Jón Hreinsson, 30.12.2008 kl. 23:56]

Já félagar, þetta er einhvað sem maður kannast við, því miður.  Ég hef nú stundum sagt að Vegagerð ríkisins beri einna mesta ábyrgð á því hve mikill fólksflótti hefur verið frá Vestfjörðum.  Sögur eins og þessi renna stoðum undir slíkar hugleiðingar.

Ég las það í skýrslu frá árinu 2005 að snjómoksturskostnaður á Dynjandisheiði væri áætlaður 8,1 milljón á ári.  Í annari skýrslu kemur fram að meðaltals fjöldi mokstursdaga á Dynjandisheiði væru 16 á ári en heiðin er að meðaltali lokuð 120 daga á ári.

VArðandi upplýsingar Vegagerðarinnar um færð á vegum hef ég það yfirleitt á tilfinningunni að þær séu settar þannig fram að ef það gerist að einstaklingar lendi í óhöppum vegna færðar eða veðurs, sé Vegagerðin búin að fyrra sig allri ábyrgð með ýktum upplýsingum, eða hreinlega lognum.

[Eggert Stefánsson (IP-tala skráð) 31.12.2008 kl. 17:02]

Mánudaginn 29. des. var ég í Reykjavík, ætlaði að aka heim til Ísafjarðar.  Þurfti að vinna smávegis að Kletti í Kollafirði (Barð).  Um morguninn athugaði ég kort Vegagerðarinnar, þar kom fram að ófært væri um Dynjandis- og Hrafnseyrarheiðar og engin merki um mokstur.  Hringdi í upplýsingasaíma Vegagerðarinnar, fékk þau svör að ekki yrði mokað á þessari leið í dag.  Ég ákvað því að að loknu verki á Kletti færi ég til baka í Þorskafjarðarbotn og yfir Þorskafjarðarheiði til Ísafj. (Þorskafj.heiði var reyndar líka sögð ófær, en þeir sem til þekkja vita að í skikkanlegu veðri er oftast lítið mál að fara hana á breyttum jeppa)  Eftir verklok á Kletti ákvað ég að hringja tvö símtöl,  (ekki í Vg.) fékk þær fréttir að Orkubúið hefði látið moka Hrafnseyrarheiði um morguninn.  Brenndi því vestur úr og hitti fólk á 3-4 bílum á Dynjandisheiði sem var sæmilega jeppafær.  Leiðin var því jeppafær, en flughált á svellblettum.  Því miður er þessi saga alls ekkert einsdæmi.  Hef marg sagt það áður og segi það enn:  Þetta samgönguleysi á Vestfjörðum stendur mannlífi hér fyrir þrifum.  Engin sambærileg dæmi eru til á landinu.  Þessu verður að breyta.  STRAX !