Hugarflug

Í lestinni á leiðinni í skólann sem ég gjarnan djúpar og skemmtilegar bloggfærslur. Þær eru fullar heimspekilegum vangaveltum og háði á samfélag nútímans og sjálfið. Það er kannski rangt að kalla það bloggfærslur þar sem þetta eru bara hugsanir sem ná ekki lengra þó ég ætli þeim það hlutverk að enda á netinu í lok dags. Þegar ég sest við tölvu um kvöldið eru þessar hugleiðingar mínar horfnar að mestu og það eina sem skaddað minni mitt nær að endurheimta, eru hálfkláraðar setningar og hugtök sem erfitt er að ímynda sér hvernig raða eigi saman. Illa dugar að draga upp penna þegar hugur minn fer á flug í lestarferðunum, því penninn, líkt og tölvan, setur hugmyndum mínum gjarnan skorður. Þessar skorður eru tíminn sem það tekur að skrifa niður orðin, sem mynda setningarnar sem eiga að túlka þessar hugsanir. Stundum væri ágætt að vera tengdur við einhverskonar hugsana-sírita.

Þangað til ég kemst yfir svoleiðis tæki þurfa lesendur þessa bloggs að sætta sig við að lesa hálfar hugsanir og fabúleringar.

Athugasemdir

[Níels A. Ársælsson., 9.11.2008 kl. 23:15]

Góður polli !

[Katrín, 10.11.2008 kl. 00:07]

hehehe ég veit ekki hversu oft ég hef verið einmitt að hugsa það sama, hugsanalesari  eða síriti væri þarfaþing fyrir mig.  Það væri bara frábært að geta tengt tækið við kollinn að kvöldi og tæmt....og vélritað síðan upp daginn eftir.  Maður ætti kannski að hanna gripinn sjálfur í stað þess að bíða eftir að einhver annar geri hlutina